رباعيات أبو رحيق
الزبير سعيد
الونسة السودانية، مثل المائدة السودانية «زمااان»، لما كانت متنوعة ولذيذة… تجد فيها تمازجاً بين الكلام في مشاكل الحياة اليومية ونقاش الكورنجية، بالإضافة إلى حديث ثقافي فني هامس، ولا يغيب عنها الحديث في شؤون الدين والمجتمع، ويتحلق الناس حول ظرفاء المدينة، الذين هم «ملح المجالس الخالي من اليود».
في هذه الأيام، زحف الفقر بقوة على المائدة السودانية حتى أصبحت، كما قال صديقي الرباطابي: «صينيتنا بقت زي كابتن الفريق المحاط بنجوم الفريق لأداء قسم الولاء والانتصار قبل كل مباراة»..
صديقنا ده غايتو جربنا عينو في الشتاء، لقيناها أبرد من نخرة الكلب؛ لكن في الصيف ما بقدر أضمن ليكم الحكاية.. يعني تعملوا ساتر أحسن.
أي تجمع سلمي للسودانيين في هذه الأيام يبدأ فيه النقاش بتدهور الجنيه السوداني، وفشل موسم الأمطار بما يهدد الموسم الزراعي، ثم يسخن النقاش بموضوع الفنان محمد النصري، وتُختتم الجلسة بالحديث عن حظوظ الهلال والمريخ في الترقي إلى دور المجموعات في البطولة الأفريقية، مع كسرة بالحديث عن التنافس بين برشلونة والريال في كل شيء.
رباعيات هذا العدد عبارة عن ونسة سودانية.
كيفن يا «حكومة» تقسي وعلينا تعصري…
و«البوش اللذيذ» محتاج لفولنا المصري…
فريق الهلال عايز مهاجم عصري…
وكل المواقع اتشربكت في «النصري»….
++++++++++++++
«الكاف» راقد ليهو بس فوق رأي…
وهلالنا العظيم ما بخاف من «التغراي»….
«سيداما» حتماً بكرة تمرق ساي…
جايينك عديييل.. جهز كبابي الشاي…..
++++++++++++++
يا كريم، تعدّل لي هلالنا طريقو…
لا يواجه صعاب، لا أي حاجة تعيقو…
يجغم «الحبشي» وكمان ينشف ريقو….
«وأبو القدح بعرف محل يعضي رفيقو»…..
++++++++++++++
«ريال مدريد» خلاص كملت حكاياتو….
و«فينيسيوس» خطير لو نطط عويناتو…..
اللاعب المنافس بالسرعة يوم فاتو…
ما عمل حاجة.. غير زعمط شعيراتو….
حاشية:
• بصراحة، الحكومة إذا لم تتراجع عن قرار حظر استيراد الفول المصري، نحن سنطالب باستيراد المزيد من حبوب التخلص من «الإمساك الحاد».
• الحاجة الوحيدة التي أضافها المدرب مورينيو لفريق ريال مدريد هي الدفاع بالسحب من الشعر… «ده كريم جديد».
• لا يجب أن يحلم الهلال بأي تعاطف من «الكاف» الذي ظلمه أمام نهضة بركان.
• حوريا كوناكري قالوا رفع شعار هزيمة الوصيف «باللعب الدايت»، وتوفير «السكر» لدوري المجموعات.
• بالمناسبة.. «الونسة الدايت» معناها «ونسة ما فيها نميمة ولا قطيعة».
• نتمنى الشفاء للكابتن مصعب كردمان، الذي لعبت به الإصابات أكثر مما لعب هو للهلال.
• لو وشوش صوت الريح في الباب، بنفتح الشباك عشان نعرف المطرة صابا وين.
