هلاويات
عبد الوهاب هلاوي
يا سبحان الله.. سألت نفسي ألف مرة : الدرعني من يوم قمت في كتابة الشعر شنو؟ والله ما عارف.. ويا ريتني كنت عارف.
وأنا عمري زي ستاشر سنة، كتبت ضمن ما كتبت قصيدة (زارع القسي).. وكانت أول قصيدة تتنشر لي في مجلة الإذاعة والتلفزيون.. صفحة الأسبوع الفني لمحررها علي مختار.. يا حليل أيامو.
أتذكر اشتريت من العدد داك يمكن عشرة نسخ..
(بالله يا زارع القسي.. لمتين
يلازمني الأسى..
ومتين شراع الشوق يعود..
أسعد بي لو في يوم رسى..
بالله يا زارع القسي..
البينا راح.. صحي اتنسى..
يا حليل عيونك بي الحنان..
وكتين تجيني مونسة..
يا حليل رسايلك والصور..
وحاجات كتيرة مقدسة..
والكلمة ديك.. وريدي ليك
يا زولي لامن تهمسا..
بالله يا زارع القسي..
أصلو البحب بلقى الأسى..
والدمعة لو ريدنا اتنسى
طول عمري كيفن بحبسا)
طبعاً في كم بيت طارت مني.
أها، لما جيت الخرطوم وسكنت الدناقلة بحري.. كنت اتعرفت بي الفنان القدير صديق الكحلاوي.. كان كل فترة بجيني ونطلع الكراسي قدام بيتنا، وأنا بتكيف من ونستو، خاصة لما يحكي لي عن صديق عمرو الكاشف.
أها، رحت أديت مرة صاحبي الكحلاوي أغنية (زارع القسي).. وصدقوني لحنها في الجلسة ونحن قدام البيت.. بعد فترة غناها في الإذاعة.
ويا سبحان الله، أمس بعد سنين طويلة جداً لميت ليك في الأغنية نازلة في قروب من القروبات بعد نشرها صاحبي الجميل طارق فضل.
اتذكرت صاحبي الكحلاوي وأيامي معاهو..
اتذكرت الزولة القطعت فيها الأغنية دي بعد قاطعتني.. طبعاً هي بتكون هسه نستني.. من زمان كانت ريادة.
غايتو الله يدي العافية كل النسونا ونحن نسيناهم.. بس غنانا ما نساهم.. وكل ما نحن نسمع حاجة بنتذكرهم.. يا ربي هم هسه وين في الدنيا دي.. ولسه يا ربي في سماحتهم ولا لحقوا زينا أمات طه؟!
(والدمعة لو ريدنا اتنسى..
طول عمري كيفن
بحبسا)
ملحوظة: بالله شوف كضب زمان ده.
