اللهم قصائد.. خفيفة ظل..

هلاويات

ع. هلاوي

يا سبحان الله، أنا عندي قدرة كده من قصيدة، أو حتى من بيت واحد في قصيدة، أقدر أعرف ليك الشاعر الدمو خفيف ولطيف وظريف من الشاعر الدمو تقيل وثقيل.
في فترة من الفترات عملت دراسة عديل كده عن (قصيدتك هي شخصيتك)..
في ونسة مع صديقي الراحل سعدالدين إبراهيم مشينا لأكثر من كده..
قلت ليه: تعرف يا سعد، أنا مرات بتخيل شكل الشاعر نفسو من خلال قصيدتو.. أبيض.. أسود.. سمين.. ضعيف.. سمح.. شين وكده.
ضحك سعد وقال لي: أنا كان ما اتخيلت صورة الشاعر أساسًا ما بقرا القصيدة.. يا بعرفو أصلًا يا بتخيلو.. الصور الذهنية بتقرب المسافات.

عمومًا أنا بحلف إنو كل الشعراء تقريبًا ناس لطيفة ودمها خفيف، ولو لقيت غير كده تأكد إنو ما شاعر.. متلعبس ساي..؟!
في شعراء مش ظرفاء ودمهم خفيف وبس.. ديل أكتر من كده، دمهم شربات عديل.. وطبعًا زي ما المطربين عندهم أغنيات دكاكينية، برضو الشعرا عندهم، وما في حد أحسن من حد.

من القصايد الدكاكينية.. كتب الشاعر الغنائي الراحل عبدالرحمن مكاوي قصيدة في ذلك الزمان القديم، من وحي شارع بيت محبوبتو بالليل، سميناها نحن الأصدقاء قصيدة (الكلب)، فعشنا نتندر بها في مجالسنا حتى بعد أن انتهت العلاقة.. تقول القصيدة:
(وجيتكم يا حبايبنا..
أريتكم بي خطاي تصحو..
كلبكم حتى ما عرفني
ده هوهو فيني
بي صحو)
ليعيش الكلب كأشهر كلب في ذلك الحي وسط مدينة بحري.

أيام مايو.. كتب الصديق الشاعر تاج السر عباس قصيدة ضاحكة تقول:
(بيني ما بينك علاقة..
أصيلة زي جعفر نميري..
شامخة زي قاعة الصداقة)
وقد وجدت هذه القصيدة رواجًا شديدًا بين الناس..
وما غريبة.. مش ده شاعر (أقول أمكن أنا الما جيت).

وكتب الصديق الراحل عزمي أحمد خليل قصيدة (فد ريال)، بعد أن استلفت منه إحداهن ريالًا، لكنها أحست بالحرج وهي تتأخر في رده، فكتب عزمي:
(هو ريال شنو الشلتيهو
في لحظة دلال
من قبلو ما شلتي العمر
وأيه يعني قيمة..
فد ريال)

كما كتب الشاعر العظيم، عليه الرحمة، عكير الدامر قصيدة خفيفة الظل يقول فيها:
(ختت إيدها في إيدي
انجذبت ودرتا..
لو ما الحنة بيني وبينها..
كنتا حرقتا..
ولو ما دموعي.. من كترة دموعي
غرقت)

أذكر أنني كتبت ذات مرة أغنية (لون الكاكاو)، وقد قام بوضع اللحن لها وتقديمها للناس المطرب الراحل الصافي محمد أحمد، لتكسبه هذه الأغنية شهرة واسعة، ويطلق الناس عليه اسم (لون الكاكاو):
(الصبر جميل قالوا وطيب..
يا قلبي كفاك
أوعى تغيب..
السكر عمرو بدوب يا ناس
أول مرة نشوفو
يدوب.. لون الكاكاو).