هلال وظلال
عبد المنعم هلال
ــ في زمن بقى فيه الحكم سريع، والكلمة بتتقال بدون حساب، بقى ساهل جداً إنك تهاجم لاعب وتنسى تاريخه وتكسر مجاديفه عشان فترة هبوط عابرة، لكن الصعب والرجالة إنك تقيف مع الزول وقت الشدة وترد ليه الجميل.
ــ الكلام ده بنقوله اليوم عن القائد، عن الرمز، عن الزول البسعد جماهير الهلال سنين طويلة، محمد عبد الرحمن الغربال.
ــ نعم، الغربال ما في مستواه المعهود، ودي حقيقة ما بننكرها.
ــ لكن برضو في حقيقة أكبر وأهم: الغربال ده ما لاعب عادي عشان نحاسبه زي أي لاعب تاني.
ــ ده زول حمل الهلال فوق كتافه في أوقات كتيرة، في مباريات كانت مقفولة كان هو المفتاح، وفي لحظات كانت محتاجة قلب كان هو القلب، وفي ليالي أفريقية صعبة كان هو الأمل.
ــ الذاكرة الكروية ما مفروض تكون قصيرة كده، ما معقول ننسى أهدافه الحاسمة، وفرحته مع الجماهير، ودموعه بعد الانتصارات، وإصراره في أصعب الظروف، ونمسك بس في كم مباراة ما كان فيها في يومه..!
ــ الهلال، عبر تاريخه، عمره ما كان نادي بيجحد نجومه.
ــ الهلال مدرسة، والهلال أسرة، والأسرة ما بتطرد ابنها عشان تعب شوية.
ــ الناس البتنادي بشطب الغربال أو اعتزاله، خلونا نكون واضحين: الكلام ده ما عنده أي علاقة بالمنطق ولا كرة القدم، ده كلام ناتج عن انفعال لحظي وغضب ما محسوب.
ــ القائد ما بيتشال بقرار عاطفي، القائد بيتحمل وبيندعم وبيتسند لحدي ما يرجع.
ــ وبرضو ما ممكن نغفل الحاصل من الند التقليدي، فهناك البعض من إعلام وجماهير التمهيداب واضح جداً إنهم مستهدفين الغربال، دايرين يكسروه ويطلعوه من الصورة ويضعفوا الهلال من الداخل.
ــ لكن السؤال المهم: هل نحن حنكون جزء من اللعبة الحمراء دي؟ وهل حنخلي زول غريب يحدد لينا مصير لاعبنا وقائدنا؟ المفروض يكون العكس.
ــ الغربال خط أحمر.
ــ من يستهدف الغربال يستهدف الهلال.
ــ الغربال لن يسقط، لأن خلفه جمهور يعرف قيمته.
ــ كفاية جلد الغربال.. سيعود.
ــ الغربال أكبر من حملات التشكيك.
ــ يا غربال، يمكن الأيام دي صعبة عليك، ويمكن الضغط كبير، لكن إنت ما لاعب عادي.
ــ إنت زول اتعودت تقوم بعد كل وقعة وتثبت للكل إنك كبير.
ــ الجماهير الحقيقية واقفة معاك يا غربال، الناس البتعرف قيمتك ما بتتخلى عنك، والهلال البنعرفه ما برمي أولاده.
ــ حنفضل فاكرين كل حاجة عملتها.
ــ حنفضل شايفين فيك القائد.
ــ وحنستنى رجعتك، لأننا واثقين إنها جاية، يمكن تتأخر شوية، لكن أكيد حتجي، وأكيد حتكون أقوى من قبل.
ــ كل الدعم ليك يا غربال.
ــ وعدك الرجوع، ووعدنا الوقفة معاك لحدي النهاية.
