عزمي.. يعني كيفن ما بريدك؟

ع هلاوي

• اتصل بي عدد من أصحابي..
  ناس بشري وعاطف..
  (بكره يا هلاوي يوم عشرة مايو.. الذكرى السابعة لرحيل صاحبك عزمي).

قربت أقول ليهم: من يوم رحل عزمي، ولي هسه.. كل الأيام من بعدو رحيل.. كل الأيام صيوان عزا.. وكسر تربة.. ودمعة في منديل.

الله يرحمك يا عزمي.. إنت عارف إنك في حياتي حاجات كتيرة.. لو ما كل الحاجات.

مما عرفتك وإنت عندي جو الطيف.. موية زير باردة، وظل نيمة، وضحكة بترجع القلب لسنة أولى.

عزمي.. والسنة جنبك ستة شهور.. ناقص ستة.. والخريف شهرين، وكذا الشتا والصيف. وعزمي جنبك، أيام الأسبوع كانت تلاتة، وساعات اليوم ستة.. بهرب وين العمر أنا ما عارف.

إنت القدرة على تحويل كل الأمكنة لمكان واحد مستف ضحك وحسن نية. مدرسة ذات طابع خاص في محبة خلق الله.

ما يسألوني عن أصحابك.. ده ما جايز.. الصح يسألوني: منو الما صاحبك؟.. تخصص في محبة الناس بدون قيد أو شرط.

وإنت حالة خاصة.. إنسان بشتري وبيبيع الحب مهما ارتفع ثمنه.. بالجملة.. قطاعي ما في.

وعزمي متى وجد الحب، بشتري كل الشحنة.. ينزل اللوري كلو.. أصحابو بالجملة.. حبيباتو بالجملة.. والعجيب صادق معاهم كلهم.. بكتب ليهم كلهم رسايل وقصايد، ويواعدهم، وببكي من قلبو لو جو.. أو ما جو..
(تردي ولا ما تردي.. بكتب ليك يومياتي).

عزمي قدرة خرافية على جمع الناس، على اختلاف مشاربهم، في حلقة حب واحدة.. وقدرة على التحرك في كل الاتجاهات الحنينة.. تشرك لي ببسمة.. وبيت شعر.. كل الشعرا في الدنيا حبايبو.. وليهو مع كل مغني أو عازف حكاية.. من الأمكنة المفضلة عندو باب بيتنا في الميرغنية، وهو يتابع حركة المواصلات..
(وتمر يا بص الثانوية.. شايل ست روحي وعينيا).

بالمناسبة، عزمي في بيتنا ما كان صاحبي براي.. ده صاحب أمي وإخواني وأخواتي.. زوجتي وعيالي.. نسابتي وجيراني.. إنسان، زي ما قلت ليكم، بحب بالجملة.. أو إنسان بحب الحب في روحُه.. أو قول حالة حب جات الدنيا..

سبقني عزمي على نشر قصايده في الصحف والمجلات، وإن سبقته أنا على مطربي العاصمة..
(خبر زفاف) لـعثمان مصطفى كانت أولى أغنياته، ألحان موسى محمد إبراهيم.. وبعد داك ما تشوف إلا نور.. ده كلام برا..

من قلبي بتمنى لو كتبت كتاب عن شعره.. كل حياتو، من الإبرة والدبوس لي الطيارة، حاضرة.. هو في المملكة.. للإمارات.. وحتى أمريكا التي عاد منها على كفن.. عشان نستقبلو في مطار الخرطوم أنا وأصحابي محمد نجيب محمد.. علي وعزالدين هلالي.. في مثل نفس اليوم ده قبل سبع سنوات..

واه من الدنيا..

عفواً عيوني، بس غصباً عنك حأكتب وأكتب عن عزمي، وكل الناس الطيبة الجات بس عشان تجمل الدنيا.